الأربعاء، 30 ديسمبر، 2015



رغم كل الاحداث اللي صارت في حياتي 

اقدر اقول انه ٢٠١٥ كانت غير والله 



بسميها سنه التجارب سنه طيش سنه تهور ...



جربت وايد اشيا وسويت اشيا ادري انها غلط اجتماعيا لكن سويتها من باب التجربه 



هالسنه غيرتني وايد غيرت طريقه تفكيري كلامي اسلوبي ،، 


يمكن نضجت اكثر ويمكن لا 


سافرت وايد يمكن ست مرات خلال هالسنه 

واخر سفره اليوم رجعت منها 


كنت في كويت ... لما وصلت من المطار قررت اصعد ع الميزان طبعا ما تبون تعرفون كم زدت 

شكرا مطاعم كويت ، طلعت لي خدود 



امي تقول فشلتينا الناس تضعف عقب الطلاق و انتي يالسه تمتنين 



والله من الراحه النفسيه الحمدلله .









ادري بتقولون لي الشي مب مستحب ولا حتى حرام

لكني صار لي شهرين تقريبا داومت ع زياره المقبره مرتين بالاسبوع


اطلع من الجامعه و اسير ، الصبح



احس لما اقعد عن قبر ابوي و اسولف ، اوكيه الهنود اللي يجوفوني يحسوني مينونه

بس انا احس براحه مو طبيعيه


اسولف مع ابوي ..

عن اخبارنا واحد واحد ،


اشكي له من امي

ومن اخويه الكبير

وبعدين عن علاماتي اللي تفشل في الجامعه

واسولف واسولف واسولف ،،، و اسير



...




حلمت حلم غريب اول امس


شفتني طالعه من بيت اهل طليقي وكنت لابسه فستان شتوي وفوقه عباتي وطليقي يمشي وراي ولما طلعنا

لقيت ابوي واقف بسيارته لاند كلوزر موديل ١٩٩٧

وكان ، معصب


معصب ع طليقي


فتح له ابويه الدريشه وكان ساكت وكانه مايبى يكلمه

قاله طليقي

طلعت من ذمتي و ارجعت في ذمتك !


فهز ابوي راسه وركبت السياره في السيد الخلفي ما اعرف ليش ما ركبت جدام


و مشى ابويه و وعيت من الحلم ..




امي تقول الاعمار بيد الله مدري شو تقصد الولده بموت شكلي.





لعله خير ماحبيت افسره ،






احس خربطت وايد وبطريقه عشوائيه يمكن اني تعبانه من السفر


باجر غالبا بحذف اللي كتبته وبكتب شي نفس الناس



الشخصيه الاستهباليه تطلع وانا تعبانه


معسلامه

هناك 4 تعليقات:

ٌرحيـــــــــــــــــــــــل يقول...

الله يعطيج طولة العمر والحمدلله عسلامتج :)
كلي كلي ما ورانا شي، هذا فصل الأكل فصل الشتا حلاة الأكل ، قريب بتداومين و بتنكرفين استمتعي بالاجازة كلي و اطلعي...

أغبطج أنج تقدرين تزورين قبر أبوج، قبر يدتي في السعودية لأنها ماتت وهي رادة من السعودية... بالعكس أشجعج تروحين و تزورينه وتفضفضين :) عقب تدوينج عن الشارع اللي تتمنين يسكرونه دوم أدعي لأبوج ...

أحبج

حــبــر ورقــــ ! يقول...

الله يسلمج من الشر

ههههههههه رحيل لا تشجعيني اكل شجعيني اسوي رجيم الوضع ما يطمن




الله يرحمها ويرحم جميع موتى المسلمين

يزاج الله خير ..



وانا بعد احبج ..

Khaled A يقول...

هههه الكويت كلها مطاعم فأكيد يزيد وزنك

الغالب عنده نفس الفكرة بان 2015 كان غير وخاصة من ناحية الوعي والنضج
أتمنى لج سنة خير وسلام

بخصوص الحلم اعتقد انه أفكار متضاربة بيسعى العقل على الاتزان

حــبــر ورقــــ ! يقول...

و اتمنى لك المثل اخوي خالد


يمكن كلامك صح لاني وايد احلم هالايام احلام متشابه ومتكرره بشكل ما



شكرررا لوجودك